കോവളം ഫുട്‌ബോള്‍ ക്ലബ്ബിന് സാമ്പത്തിക പിന്തുണയുമായി ഫെഡറല്‍ ബാങ്ക്

Posted on: September 29, 2022

തിരുവനന്തപുരം : ബാങ്കിന്റെ സാമൂഹിക പ്രതിബദ്ധതാ പദ്ധതിയുടെ ഭാഗമായി കോവളം ഫുട്‌ബോള്‍ ക്ലബ്ബിന് ഫെഡറല്‍ ബാങ്ക് സഹായം അനുവദിച്ചു. വിഴിഞ്ഞം ആസ്ഥാനമായുള്ള ദി കടലോരം സൊസൈറ്റി ഫോര്‍ എംപവറിങ് യൂത്തിനു കീഴിലെ ക്ലബാണ് കോവളം എഫ്സി. ക്ലബ് ആസ്ഥാനത്തു നടന്ന ചടങ്ങില്‍ ബാങ്കിന്റെ ചീഫ് മാര്‍ക്കറ്റിങ് ഓഫീസര്‍ എംവിഎസ് മൂര്‍ത്തി, ബാങ്കിന്റെ തിരുവനന്തപുരം സോണല്‍ മേധാവി രഞ്ജി അലക്‌സ്, റീജിയണല്‍ മേധാവി നിഷ കെ ദാസ്, ബാങ്കിന്റെ വിഴിഞ്ഞം ശാഖാ മാനേജര്‍ മൂമിനത് ബീവി കെ എന്‍ എന്നിവര്‍ ചേര്‍ന്നു നല്‍കിയ ചെക്ക് ക്ലബ്ബിനു വേണ്ടി പ്രസിഡന്റ് ടി ജെ മാത്യൂ സ്വീകരിച്ചു.

ക്ലബ്ബിന്റെ ഹെഡ് കോച്ച് എബിന്‍ റോസ്, കോച്ച് ഇഗ്‌നേഷ്യസ്, ക്ലബ് അംഗങ്ങള്‍, ബാങ്കിലെ മറ്റ് ഉദ്യോഗസ്ഥര്‍ തുടങ്ങിയവര്‍ ചടങ്ങില്‍ പങ്കെടുത്തു.

തീരദേശ മേഖലയില്‍ നിന്നുള്ള യുവ കായിക പ്രതിഭകള്‍ക്ക് മികച്ച പരിശീലനം നല്‍കി വളര്‍ത്തിക്കൊണ്ടുവരികയാണ് കോവളം എഫ്സിയുടെ ലക്ഷ്യം. ഈ രംഗത്ത് മികച്ച മുന്നേറ്റം നടത്തിയ ക്ലബ് ശ്രദ്ധേയമായ നിരവധി നേട്ടങ്ങള്‍ കൊയ്തിട്ടുണ്ട്.

ഇത്തരം കൂട്ടായ്മകളെ പരിപോഷിപ്പിക്കുന്നതിലൂടെ ബാങ്കിനു സാന്നിധ്യമുള്ള പ്രദേശങ്ങളിലെ സാമൂഹിക പ്രതിബദ്ധതാ പരിപാടികളില്‍ വലിയൊരു പങ്കുവഹിക്കാനും അതിലൂടെ രാജ്യത്തിന്റെ വളര്‍ച്ചയില്‍ പങ്കാളികളാവാനുമാണ് ശ്രമിക്കുന്നതെന്ന് ബാങ്കിന്റെ സിഎംഒ എം വി എസ് മൂര്‍ത്തി പറഞ്ഞു.

ക്ലബ് അംഗങ്ങള്‍ക്ക് ടൂര്‍ണമെന്റുകളുമായി ബന്ധപ്പെട്ട് യാത്ര ചെയ്യാനുള്ള ബസ് വാങ്ങാനും, കായിക ഉപകരണങ്ങള്‍ വാങ്ങാനും മറ്റുമുള്ള ചെലവിലേക്കായും കഴിഞ്ഞ വര്‍ഷങ്ങളില്‍ ബാങ്ക് സംഭാവന നല്‍കിയിരുന്നു.

TAGS: Federal Bank | Kovalam FC |