കൊച്ചി ആസ്ഥാനമായ ഫിന്‍ടെക് സ്റ്റാര്‍ട്ടപ്പ് ട്രെയ്‌സിന് നാസ്‌കോം എന്‍ഐപിപി ജിസിസി അവാര്‍ഡ്

Posted on: September 17, 2022

കൊച്ചി : കൊച്ചി ആസ്ഥാനമായി പ്രവര്‍ത്തിക്കുന്ന ഫിന്‍ടെക് സ്റ്റാര്‍ട്ടപ്പായ ട്രെയ്‌സിന് നാസ്‌കോം പങ്കാളിത്തമുള്ള എന്‍ഐപിപി ജിസിസി ഫിന്‍ടെക് ചലഞ്ച് അവാര്‍ഡ് ലഭിച്ചു. പ്രെഡിക്റ്റീവ് അനലിറ്റിക്സ് ഫോര്‍ കസ്റ്റമര്‍ റീട്ടെന്‍ഷന്‍ എന്ന വിഭാഗത്തിലാണ് അവാര്‍ഡ് ലഭിച്ചത്. ആര്‍ട്ടിഫിഷ്യല്‍ ഇന്റലിജന്‍സ് ഓഗ്മെന്റഡ് ഏര്‍ലി വാണിംഗ് ആന്‍ഡ് ബിസിനസ് റിസ്‌ക് മോണിറ്ററിംഗ് സിസ്റ്റം സ്റ്റാര്‍ട്ടപ്പാണ് ട്രെയ്‌സ്. ധനസഹായം കൊടുക്കുന്ന കമ്പനികള്‍ക്ക് വേഗമേറിയതും സുരക്ഷിതവുമായ ഫിനാന്‍സിംഗിനായി പ്രവര്‍ത്തനക്ഷമത മെച്ചപ്പെടുത്താന്‍ പ്രവചനാത്മക എഐ എങ്ങനെ ഉപയോഗിക്കാമെന്ന് കാണിച്ചതിനാണ് അവാര്‍ഡ് ലഭിച്ചത്. കൊച്ചിക്ക് പുറമെ ചിക്കാഗോയിലും ട്രെയ്‌സിന് ഓഫീസുണ്ട്.

ഈ അവാര്‍ഡ് നേടിയതില്‍ ഞങ്ങള്‍ക്ക് സന്തോഷമുണ്ട്. ചെറുതും വലുതുമായ ധനകാര്യ സ്ഥാപനങ്ങള്‍ക്ക് പ്രവര്‍ത്തനങ്ങള്‍ എളുപ്പത്തില്‍ കൈകാര്യം ചെയ്യാനും നിരീക്ഷിക്കാനും പോര്‍ട്ട്ഫോളിയോകള്‍ റിസ്‌ക്ക് ചെയ്യുന്നതു കുറക്കാനും നഷ്ടം ലഘൂകരിക്കാനും കഴിയുന്ന ഒരു നൂതന പരിഹാരം വികസിപ്പിക്കുന്നതിന് ഞങ്ങള്‍ നടത്തിയ കഠിനാധ്വാനത്തിന്റെ ഫലമാണിതെന്ന് ട്രെയ്‌സ് സിടിഒ ഗീത രാമസ്വാമി പറഞ്ഞു.
ബാങ്കിംഗ്, ഇന്‍ഷുറന്‍സ്, സാമ്പത്തിക സേവന മേഖലകളിലെ സ്ഥാപനങ്ങളുടെ കാര്യക്ഷമതയെ ബാധിക്കുന്ന തടസ്സങ്ങളെ അഭിസംബോധന ചെയ്യാന്‍ സ്റ്റാര്‍ട്ടപ്പുകള്‍ക്ക് പരിഹാരങ്ങള്‍ കണ്ടെത്താനാകുന്ന ഒരു മത്സരമാണ് എന്‍ഐപിപി ജിസിസി ഫിന്‍ടെക് ചലഞ്ച്. ഇന്ത്യന്‍ ടെക് വ്യവസായത്തിന്റെ പ്രീമിയര്‍ ട്രേഡ് സ്ഥാപനമായ നാസ്‌കോമാണ് ഈ ചലഞ്ചിനെ പിന്തുണയ്ക്കുന്നത്.

നോണ്‍ പെര്‍ഫോമിംഗ് അസറ്റുകള്‍ ബാങ്കുകള്‍ക്ക് ഒരു സ്ഥിരം പ്രശ്‌നമാണ്. അവ കടം കൊടുത്തവരുടെ ലാഭവിഹിതം കുറക്കുന്നതിനാല്‍ പോര്‍ട്ട്ഫോളിയോകള്‍ മെച്ചപ്പെടുത്താനും തന്ത്രപരമായ റിസ്‌ക് എടുക്കാനും തടസ്സമാകുന്നു. പ്രശ്നമുള്ള അക്കൗണ്ടുകള്‍ നേരത്തെ തിരിച്ചറിയാന്‍ ട്രെയ്‌സ് മെഷീന്‍-ലേണിംഗില്‍ അധിഷ്ഠിതമായ പ്രെഡിക്ടീവ് അനലിറ്റിക്‌സ് ഉപയോഗിക്കുന്നു. ഇത് നേരത്തെ തടയാനുള്ള നടപടികളെടുക്കാനും, ഹാനികരമായ ആസ്തികള്‍ എഴുതിത്തള്ളല്‍ കുറയ്ക്കാനും, പോര്‍ട്ട്ഫോളിയോ മെച്ചപ്പെടുത്താനും, മതിയായ സമയം നല്‍കുന്നു.

ഈ മേഖലയുടെ അനുദിനം വികസിച്ചുകൊണ്ടിരിക്കുന്ന സ്വഭാവവും അഭിമുഖീകരിക്കുന്ന ഭീഷണികളുടെ സങ്കീര്‍ണ്ണതയും മനസ്സിലാക്കുന്ന ഒരു ആപ്ലിക്കേഷന്‍ നിര്‍മ്മിക്കുന്നതിന് ഞങ്ങള്‍ സാമ്പത്തിക വിദഗ്ധരുമായി സ്ഥിരമായി പ്രവര്‍ത്തിച്ചിട്ടുണ്ടെന്നു ട്രെയ്‌സ് സിഇഒ സോണി ഗബ്രിയേല്‍ പറഞ്ഞു. ട്രെയ്‌സ് ആപ്ലിക്കേഷനെ ധനകാര്യ പ്രൊഫഷണലുകള്‍ക്ക് യഥാര്‍ത്ഥ റിസ്‌ക് മോണിറ്ററിംഗ് സൊല്യൂഷനാക്കി മാറ്റുക എന്നതാണ് ഞങ്ങളുടെ ലക്ഷ്യം. ഈ അവാര്‍ഡ് ഞങ്ങളുടെ ശ്രമങ്ങളുടെ വിജയമാണ്. ഇത് ഞങ്ങള്‍ ശരിയായ പാതയിലാണെ് തെളിയിക്കുന്നുവെന്നും സോണി ഗബ്രിയേല്‍ പറഞ്ഞു.

TAGS: Traice |