ടാറ്റ ക്രൂസിബിള്‍ കാമ്പസ് ക്വിസ് കൊച്ചി എഡിഷന്‍ മത്സരം ജനുവരി 13ന്

Posted on: January 10, 2020

കൊച്ചി : ഇന്ത്യയിലെ ഏറ്റവും വലിയ ഇന്റര്‍-കോളജിയേറ്റ് ബിസിനസ് ക്വിസ് മത്സരമായ ടാറ്റ ക്രൂസിബിള്‍ കാമ്പസ് ക്വിസിന്റെ പതിനാറാമത് എഡിഷന്‍ മത്സരങ്ങള്‍ക്കായുള്ള രജിസ്‌ട്രേഷന്‍ തുടങ്ങി. കൊച്ചിയും തിരുവനന്തപുരവും കോഴിക്കോടും അടക്കം ഇന്ത്യയിലെ 40 നഗരങ്ങളിലായാണ് മത്സരങ്ങള്‍ സംഘടിപ്പിക്കുന്നത്.

ദേശീയതല വിജയികള്‍ക്ക് അഞ്ച് ലക്ഷം രൂപയുടെ കാഷ് പ്രൈസും ടാറ്റ ക്രൂസിബിള്‍ ട്രോഫിയുമാണ് സമ്മാനമായി ലഭിക്കുക. പ്രാദേശിക വിജയികള്‍ക്ക് 75,000 രൂപയും രണ്ടാം സ്ഥാനം നേടുന്നവര്‍ക്ക് 35,000 രൂപയും സമ്മാനമായി നേടാം. ടാറ്റ ക്ലിക്കാണ് ഈ വര്‍ഷത്തെ ടാറ്റ ക്രൂസിബിള്‍ കാമ്പസ് ക്വിസ് മത്സരത്തിന്റെ സമ്മാനങ്ങള്‍ നല്കുന്നത്. ജനുവരി 10 ന് തിരുവനന്തപുരം ഏഷ്യന്‍ സ്‌കൂള്‍ ഓഫ് ബിസിനസ്, 12 ന് കോഴിക്കോട് ഐഐഎം, 13 ന് കൊച്ചി എസ്.സി.എം.എസ്. കൊച്ചിന്‍ സ്‌കൂള്‍ ഓഫ് ബിസിനസ് എന്നിവിടങ്ങളിലാണ് കേരളത്തിലെ മത്സരങ്ങള്‍.

മത്സരത്തില്‍ പങ്കെടുക്കുന്ന നാല്‍പ്പത് നഗരങ്ങളെ അഞ്ച് സോണുകളായി തിരിച്ചിട്ടുണ്ട്. പ്രാദേശികതല വിജയികള്‍ സോണല്‍ മത്സരങ്ങളില്‍ മത്സരിക്കും. ഓരോ സോണിലും മുന്‍നിരയിലെത്തുന്ന രണ്ട് ടീമുകള്‍ക്ക് മുംബൈയില്‍ നടക്കുന്ന ദേശീയതല മത്സരത്തില്‍ പങ്കെടുക്കാം. ‘പിക്‌ബ്രെയിന്‍’ എന്നറിയപ്പെടുന്ന പ്രമുഖ ക്വിസ് മാസ്റ്റര്‍ ഗിരി ബാലസുബ്രഹ്മണ്യമാണ് ക്വിസ് മാസ്റ്റര്‍. ക്വിസിന്റെ രജിസ്‌ട്രേഷന്‍ സംബന്ധിച്ചും നിബന്ധനകളെക്കുറിച്ചും കൂടുതല്‍ അറിയുന്നതിനായി www.tatacrucible.com എന്ന വെബ്‌സൈറ്റ് സന്ദര്‍ശിക്കുക.

ഇതിനോടൊപ്പം തന്നെ ടാറ്റ ക്രൂസിബിള്‍ ഹാക്കത്തോണ്‍ എന്ന പേരിലുള്ള മത്സരത്തിനും രജിസ്‌ട്രേഷന്‍ ആരംഭിച്ചു. മുഴുവന്‍ സമയ വിദ്യര്‍ത്ഥികള്‍ക്കും പ്രൊഫഷണലുകള്‍ക്കും പങ്കെടുക്കാം. വ്യവസായരംഗം, ശുചീകരണം, റോഡ് സുരക്ഷ തുടങ്ങിയ മേഖലകളിലെ വെല്ലുവിളികള്‍ നേരിടുന്നതിനുള്ള ആശയങ്ങള്‍ ഓണ്‍ലൈനായി സമര്‍പ്പിക്കണം. തിരഞ്ഞെടുക്കപ്പെടുന്ന മാതൃകകള്‍ അല്ലെങ്കില്‍ ആശയങ്ങള്‍ മുംബൈ, ഡല്‍ഹി, ബംഗളൂരൂ, കൊല്‍ക്കത്ത എന്നീ നാല് നഗരങ്ങളിലായി നടക്കുന്ന ഹാക്കത്തോണ്‍ ഫൈനല്‍ മത്സരങ്ങളില്‍ നേരിട്ടവതരിപ്പിക്കണം. ഏറ്റവും നൂതനമായ മാതൃക അല്ലെങ്കില്‍ ആശയം അവതരിപ്പിക്കുന്നവര്‍ക്ക് 70,000 രൂപയുടെ കാഷ് പ്രൈസും റണ്ണര്‍ അപ്പ് ടീമിന് 30,000 രൂപയുടെ ക്യാഷ് പ്രൈസുമാണ് സമ്മാനം. ഹാക്കത്തോണ്‍ സംബന്ധിച്ച കൂടുതല്‍ വിവരങ്ങള്‍ www.tatacrucible.com/hackathon/  എന്ന വെബ്‌സൈറ്റില്‍നിന്ന് ലഭിക്കും.

TAGS: Tata Crucible 2020 |