അറേബ്യന്‍ ഇതിഹാസം

Posted on: August 10, 2015

Legend-Joji-Mathew-Bigമനസുവച്ചാല്‍ അസാധ്യമായതൊന്നുമില്ലെന്ന് തെളിയിച്ചിരിക്കുകയാണ് ദുബായിലെ ലെജന്‍ഡ് ഗ്രൂപ്പ് സാരഥി ജോജി മാത്യു ചക്കുപുരയ്ക്കല്‍. 20 വര്‍ഷങ്ങള്‍ക്കുള്ളില്‍ 27 രാജ്യങ്ങളില്‍ സാന്നിധ്യമുള്ള ബിസിനസ് സാമ്രാജ്യമാണ് ഈ മലയാളി കെട്ടിപ്പടുത്തത്. മറൈന്‍ എന്‍ജിനീയറിംഗ്, റിയല്‍ എസ്റ്റേറ്റ്, കണ്‍സ്ട്രക്ഷന്‍, എച്ച് ആര്‍ കണ്‍സള്‍ട്ടന്‍സി, ജനറല്‍ ട്രേഡിംഗ്, ഹോസ്പിറ്റാലിറ്റി മാനേജ്‌മെന്റ് തുടങ്ങി വൈവിധ്യമാര്‍ന്ന മേഖലകളില്‍ പ്രവര്‍ത്തിക്കുന്ന കമ്പനികള്‍, 500 മില്യണ്‍ ടേണോവര്‍ – ഇതിഹാസ തുല്യമാണ് ലെജന്‍ഡ് ഗ്രൂപ്പിന്റെ വളര്‍ച്ച.

ചെറുപ്പം മുതലെ എല്ലാറ്റിനെയും പോസിറ്റീവായി കാണുന്ന സമീപനമാണ് ജോജി പുലര്‍ത്തിപ്പോരുന്നത്. അടങ്ങാത്ത സംരംഭക മോഹങ്ങളുമായി ഡിഗ്രി കഴിഞ്ഞയുടനെ ഈ ചെറുപ്പക്കാരന്‍ പെരിന്തല്‍മണ്ണയില്‍ നിന്ന് മുംബൈയിലേക്ക് വണ്ടികയറി. ഇന്ത്യന്‍ മാര്‍ക്കറ്റ് റിസേര്‍ച്ച് ബ്യൂറോയില്‍ ജോലി കിട്ടിയെങ്കിലും അതില്‍ ഒതുങ്ങാന്‍ ഈ സംരംഭകന്റെ മനസ് അനുവദിച്ചില്ല. ഒരു വര്‍ഷത്തിനുശേഷം സൗദിയിലേക്ക് വിസ ലഭിച്ചപ്പോള്‍ രണ്ടും കല്‍പ്പിച്ച് വിമാനം കയറി. ഒബ്‌റോയ് ഗ്രൂപ്പില്‍ ജോലി ലഭിച്ചെങ്കിലും ജോജിയുടെ മനസില്‍ സ്വന്തം സംരംഭമായിരുന്നു മുന്നിട്ട് നിന്നിരുന്നത്.

ഒന്നര വര്‍ഷത്തിനു ശേഷം സൗദിയില്‍ നിന്നും മുംബൈയിലേക്ക് മടങ്ങി. മുളുന്ദില്‍ ഒരു കേരള ഹോട്ടല്‍ തുറന്ന് ആദ്യ സംരംഭത്തിന് തുടക്കം കുറിച്ചു. തനി നാടന്‍ ഭക്ഷണം വിളമ്പുന്ന ഹോട്ടല്‍ വിജയമായപ്പോള്‍ പുതിയ മേഖലകള്‍ കണ്ടെത്താന്‍ ജോജി ഒരുങ്ങി. ഭാഗ്യപരീക്ഷണമെന്നോണം വിസിറ്റിംഗ് വിസയില്‍ ദുബായിലേക്ക് പോയി. വിജയം അനായസമല്ലായിരുന്നുവെങ്കിലും ജൈത്രയാത്രയുടെ തുടക്കം ദുബായില്‍ നിന്നായിരുന്നു. കോണ്‍ട്രാക്ട് ജോലികളുടെ സാധ്യത മനസിലാക്കി ഒരു ചെറിയ സര്‍വീസ് സ്ഥാപനമാണ് ആദ്യം തുടങ്ങിയത്. അറബി ഭാഷയിലെ പ്രാവീണ്യം ജോജിയുടെ ബിസിനസ് വളര്‍ച്ചയ്ക്ക് മുതല്‍കൂട്ടായി.

വൈകാതെ ഒരു എച്ച് ആര്‍ കണ്‍സള്‍ട്ടന്‍സി സ്ഥാപനവും തുറന്നു. തുടര്‍ന്ന്
ഹോസ്പിറ്റാലിറ്റി മാനേജ്‌മെന്റ് ബിസിനസിലേക്കും പ്രവേശിച്ചു. ആദ്യം മറ്റ് എമിറേറ്റുകളിലേക്കും പിന്നീട് മറ്റ് ജിസിസി രാജ്യങ്ങളിലേക്കും ബിസിനസ് വ്യാപിപ്പിച്ചു. ദുബായ് രാജകുടുംബാംഗമായ സലേം സെയ്ഫ് ബിന്‍ സയിദ് അല്‍കെത്ബിയുമായുള്ള പരിചയമാണ് ബിസിനസില്‍ വഴിത്തിരിവായത്. ജോജി മാത്യുവിന്റെ കഠിനാധ്വാനവും അര്‍പ്പണബോധവും തിരിച്ചറിഞ്ഞ അദ്ദേഹം ലെജന്‍ഡ് ഗ്രൂപ്പില്‍ നിക്ഷേപം നടത്താന്‍ മുന്നോട്ടുവന്നു.

ജപ്പാനിലെ മിത്സുകി കോര്‍പറേഷനെ 2011 ല്‍ ഏറ്റെടുത്തതാണ് ലെജന്‍ഡ് ഗ്രൂപ്പിന്റെ വളര്‍ച്ചയിലെ മറ്റൊരു നാഴികക്കല്ല്. ഇലക്‌ട്രോണിക് ഉപകരണങ്ങള്‍ നിര്‍മ്മിക്കുന്ന മിത്സുകിക്ക് കൊറിയ, ചൈന, തായ്‌വാന്‍ എന്നീ രാജ്യങ്ങളില്‍ നിര്‍മാണകേന്ദ്രങ്ങളുണ്ട്. ഹോം സെക്യൂരിറ്റി സൊല്യൂഷന്‍സ്, ഡിവിആര്‍, സിസിടിവി, സോളാര്‍ പാനല്‍, സോളാര്‍ ലൈറ്റുകള്‍, സോളാര്‍ വാട്ടര്‍ ഹീറ്റര്‍ തുടങ്ങി നിരവധി ഉത്പന്നങ്ങളാണ് മിത്സുകി നിര്‍മ്മിച്ച് കയറ്റുമതി ചെയ്യുന്നത്.

യുഎഇയില്‍ റിയലിട്ടി രംഗത്ത് 393 പദ്ധതികള്‍ വിജയകരമായി പൂര്‍ത്തീകരിച്ച ലെജന്‍ഡ് ഗ്രൂപ്പ് ആറ് വര്‍ഷം മുമ്പ് ഇന്ത്യന്‍ റിയല്‍എസ്റ്റേറ്റ് മേഖലയില്‍ നിക്ഷേപം നടത്താന്‍ പദ്ധതി തയാറാക്കി. നാല് വര്‍ഷത്തെ വിശദമായ സാധ്യതാ പഠനങ്ങള്‍ക്ക് ശേഷമാണ് ലെജന്‍ഡ് ഗ്രൂപ്പ് കേരളത്തില്‍ ആദ്യത്തെ പാര്‍പ്പിട പദ്ധതിക്ക് തുടക്കം കുറിച്ചത്. ലെജന്‍ഡ് ഗ്രൂപ്പിന്റെ ലാന്‍ഡ് ബാങ്കിലുള്ള 40 ലേറെ പ്ലോട്ടുകള്‍ പരിഗണിച്ച ശേഷമാണ് ആദ്യ സൈറ്റ് നിശ്ചയിച്ചത്.

Legend-Joswana-Bigകേരളത്തില്‍ ഗ്രൂപ്പിന്റെ ആദ്യ പ്രോജക്ടാണ് തൃപ്പൂണിത്തുറ പുതിയകാവിലെ ലെജന്‍ഡ് ജോസ്വാന. 15 നിലകളുള്ള ലെജന്‍ഡ് ജോസ്വാനയില്‍ 75 അപ്പാര്‍ട്ട്‌മെന്റുകളാണുള്ളത്. ഹൈബ്രിഡ് നാച്വറല്‍ പവര്‍ ബാക്കപ്പുള്ള ഇന്ത്യയിലെ ആദ്യത്തെ പാര്‍പ്പിട പദ്ധതിയാണ് ലെജന്‍ഡ് ജോസ്വാന. 2017 ഡിസംബറില്‍ പദ്ധതി പൂര്‍ത്തിയാക്കാനുള്ള തയാറെടുപ്പിലാണ് അറേബ്യന്‍ ലെജന്‍ഡ് റിയലട്ടേഴ്‌സ്. തുടര്‍ന്ന് തിരുവനന്തപുരത്തും കോഴിക്കോട്ടും ഭവനപദ്ധതികള്‍ പ്രഖ്യാപിക്കും. ക്രമേണ ഇന്ത്യയിലെ നമ്പര്‍ 1 ബില്‍ഡര്‍ ആകുകയാണ് ജോജി മാത്യുവിന്റെ ലക്ഷ്യം.

അറേബ്യന്‍ ലെജന്‍ഡ് റിയലട്ടേഴ്‌സിന് പുറമെ ജെജെഎസ് കോണ്‍ട്രാക്ടിംഗ്, മിത്സുകി ജനറല്‍ ട്രേഡിംഗ്, ലെജന്‍ഡ് ഇന്റര്‍നാഷണല്‍ കണ്‍സള്‍ട്ടന്റ്‌സ്, മദര്‍ കെയര്‍ ക്ലീനിംഗ് സര്‍വീസസ് തുടങ്ങി നിരവധി കമ്പനികള്‍ ലെജന്‍ഡ് ഗ്രൂപ്പിലുണ്ട്. 27 രാജ്യങ്ങളിലായി 1400 ലേറെ ജീവനക്കാരാണ് ഗ്രൂപ്പിന്റെ ശക്തി. ഇന്ത്യ ഉള്‍പ്പടെ എല്ലാ രാജ്യങ്ങളിലേക്കും ലെജന്‍ഡ് ഗ്രൂപ്പിന്റെ വളര്‍ച്ച ഉറപ്പാക്കുകയാണ് ജോജി മാത്യുവിന്റെ വലിയ സ്വപ്നം. കനേഡിയന്‍ സര്‍വകലാശാലയില്‍ നിന്നും ഇന്റര്‍നാഷണല്‍ ബിസിനസില്‍ ഡോക്ടറേറ്റ് നേടാന്‍ ഒരുങ്ങുകായണ് ഈ സംരംഭകന്‍.

Legend-Joji-Mathew-&-Familyപെരിന്തല്‍മണ്ണ നെന്‍മേനി ചക്കുപുരയ്ക്കല്‍ സി. വി. മാത്യുവും മറിയാമ്മയുമാണ് ജോജിയുടെ മാതാപിതാക്കള്‍. ഭാര്യ സിസി വരാപ്പുഴ സ്വദേശിനിയാണ്. വിദ്യാര്‍ത്ഥികളായ ജോസ്‌നയും ജെസ്‌വിനുമാണ് മക്കള്‍. പോസിറ്റീവ് ചിന്തകളില്‍ നിന്നും ഊര്‍ജ്ജം ഉള്‍ക്കൊള്ളാനാണ് ഈ സംരംഭകന്‍ ഇഷ്ടപ്പെടുന്നത്. സത്യസന്ധതയും സംരംഭകമനോഭാവവും നിശ്ചദാര്‍ഡ്യത്തോടെയുള്ള ചുവടുവയ്പ്പുകളുമാണ് ജോജി മാത്യുവിന്റെ വിജയരഹസ്യം. ടൈംസ് ഗ്രൂപ്പിന്റേത് ഉള്‍പ്പടെ നിരവധി അവാര്‍ഡുകളും ഈ വ്യവസായിയെ തേടിയെത്തിയിട്ടുണ്ട്.

ലിപ്‌സണ്‍ ഫിലിപ്പ്‌